ຄະນະໂຄສະນາອົບຮົມແຂວງ ຈັດພິທີ ຝືກອົບຮົມໃຫ້ສະມາຊິກພັກໃໝ່ ຊຸດທີ VI ປີ 2020.

ສ້າງຂື້ນເມື່ອ ວັນພຸດ, 05 ສິງຫາ 2020 04:35
ຂຽນໂດຍ ຄອຂ ຫລວງພະບາງ

 

ໃນວັນທີ່ 30-31 (ກໍລະກົດ) 2020 ຜ່ານມານີ້ ຢູ່ຫ້ອງປະຊຸມຂອງຄະນະໂຄສະນາອົບຮົມແຂວງ ໄດ້ຈັດພິທີ ອົບຮົມສະມາຊິກພັກໃໝ່ ຊຸດທີ VI ປີ 2020 ຂື້ນຢ່າງເປັນທາງການ ໂດຍເປັນປະທານຂອງ ສະຫາຍ ທອງຈັນ ພົມມະລັດ ຜູ້ກວດກາໜ່ວຍພັກ ຮອງຫົວໜ້າຄະນະໂຄສະນາອົບຮົມແຂວງ, ມີວິທະຍາກອນ ແລະ ສໍາມະນາກອນ ຈາກໜ່ວຍພັກວິທະຍາໄລກະສິກຳ ແລະ ປ່າໄມ້; ໜ່ວຍພັກສະຫະພັນກຳມະບານແຂວງ; ໜ່ວຍພັກອົງການກວດ

ສອບປະຈຳພາກເໜືອ; ສານປະຊາຊົນພາກເໜືອ; ຄະນະພັກຮາກຖານພະແນກແຮງງານ ແລະ ສະຫວັດດີການສັງຄົມແຂວງ; ຄະນະພັກຮາກຖານພະແນກການເງິນແຂວງ; ຄະນະພັກພະແນກສາທາລະນະສຸກແຂວງ  ເຂົ້າຮ່ວມທັງໝົດ 39 ສະຫາຍ, ຍິງ 20 ສະຫາຍ.

ການຝືກອົບຮົມຄັ້ງນີ້ ກໍເພື່ອແນ່ໃສ່ເຊື່ອມຊຶມເອກະສານມະຕິກອງປະຊຸມໃຫຍ່  ຄັ້ງທີ x ຂອງພັກປະຊາຊົນະຕິວັດລາວ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ແລະ ສໍາມະນາກອນ ຍັງໄດ້ຮຽນຮູ້ເອກະສານທັງ 5 ບົດຂອງພັກຄື: ຄວາມຮູ້ພື້ນຖານກ່ຽວກັບ-ລັດທິມາກເລນິນ; ວຽກງານກໍ່ສ້າງພັກ; ຄຸນທາດການເມືອງ, ຄຸນສົມບັດສິນທໍາປະຕິວັດຂອງສະມາຊິກພັກ; ເຊີດຊູຄວາມເປັນແບບຢ່າງນໍາໜ້າຂອງສະມາຊິກພັກ ແລະ ແກ້ໄຂພະຍາດອາດຍາສິດ, ສະກັດກັ້ນຕ້ານການສໍ້ລາດບັງຫຼວງ.

ໃນພິທີ ໄດ້ຮັບຟັງການບັນຍາຍເອກະສານຈາກສະຫາຍ ສົມມາລີ ຄຳເກັ່ງ ກຳມະການພັກແຂວງ ຮອງເລຂາໜ່ວຍພັກ ຮອງຄະນະໂຄສະນາອົບຮົມແຂວງ, ສະຫາຍ ທອງຈັນ ພົມມະລັດ ຄະນະພັກ ຜູ້ກວດກາໜ່ວຍພັກ ຮອງຄະນະໂຄສະນາອົບຮົມແຂວງ, ສະຫາຍ ບຸນຈັນ ກັນຍາວົງ ຫົວໜ້າຫ້ອງການບໍລິຫານ-ຈັດຕັ້ງ.

ໂອກາດດັ່ງກ່າວນີ້ສະຫາຍ ຄຳຫຼ້າ ລຽນປະດິດ ຄະນະປະຈຳພັກແຂວງ; ເລຂາໜ່ວຍພັກ ຫົວໜ້າຄະນະໂຄສະນາອົບຮົມແຂວງ ໄດ້ກ່າວວ່າ: ເນື້ອໃນດັ່ງກ່າວລ້ວນແຕ່ມີຄວາມສໍາຄັນ ເພື່ອເປັນເຂັມຊີ້ທິດເຍື່ອງທາງໃຫ້ ບັນດາສໍາມະນາກອນໄດ້ຮັບຮູ້,ເຂົ້າໃຈຢ່າງເລິກເຊິງ ແລະ ນໍາໄປຈັດຕັ້ງຜັນຂະຫຍາຍໃຫ້ໄດ້ຮັບຜົນ,ເຮັດໃຫ້ສະມາຊິກພັກມີຄວາມໜັກແໜ້ນເຂັ້ມແຂງ,ສືບຕໍ່ເຮັດໜ້າທີ່ການເມືອງເປັນຢ່າງດີ.