ກຸ່ມ​ເນີນ​ສະຫວ່າງ​ເມືອງ​ນານ​ເປີດອົບຮົມ​ຄວາມ​ຮູ້​ພື້ນ​ຖານ

ລາຍລະອຽດ

ສ້າງຂື້ນເມື່ອ ວັນພຸດ, 07 ເມສາ 2021 07:32

ຂຽນໂດຍ ນາງ ສົມ​ມິດ ແກ່ນ​ມະ​ນີ

ກຸ່ມ​ເນີນ​ສະຫວ່າງ​ເມືອງ​ນານ​ເປີດອົບຮົມ​ຄວາມ​ຮູ້​ພື້ນ​ຖານ​ດ້ານ​ການ​ເມືອງ-ການ​ປົກຄອງ ​ແລະ ການ​ສ້າງ​ບ້ານ​ພັດທະນາ ຊຸດ​ທີ 1.

        ​ໃນ​ຕອນ​ເຊົ້າ​ຂອງ​ວັນ​ທີ 31 ມີນາ 2021 ທີ່​ຜ່ານ​ມາ​ນີ້​ ຢູ່​ທີ່​ຫ້ອງ​ປະຊຸມ​ກຸ່ມ​ບ້ານ​ເນີນ​ສະຫວ່າງ ​ເມືອງ​ນານ ​ແຂວງ​ຫຼວງ​ພະ​ບາງ ​ໄດ້​ເປີດ​ຝຶກ​ອົບຮົມ​ຄວາມ​ຮູ້ພື້ນ​ຖານ​ດ້ານ​ການ​ເມືອງ-ການ​ປົກຄອງ ​ແລະ ການ​ສ້າງ​ບ້ານ​ພັດທະນາ ຂື້ນ ​​ໂດຍ​ການ​ເປັນ​ປະທານພິທີ​ເປີດ​ຂອງ​ທ່ານ ບຸນ​ທີ ມະນີ​ວົງ ຮອງ​​ເລຂາ​ພັກ​ເມືອງ, ມີ​ທ່ານ ຄໍາ​ກອງ ທຳ​ມະ​ເທວາ ຮອງ​ກົມ​ໂຄສະນາ​ອົບຮົມ​ສູນ​ກາງ​ພັກ, ທ່ານ ທອງ​ຈັນ​ ພົມ​ມະ​ລັດ ຮອງ​ເລຂາ​ໜ່ວຍ​ພັກ ຮອງ​ຫົວໜ້າ​ຄະນະ​ໂຄສະນາ​ອົບຮົມ​ແຂວງ ມີ​ພະນັກງານ​

ໂຄສະນາ​ອົບຮົມ​ສູນ​ກາງ​ພັກ, ໂຄສະນາ​ອົບຮົມ​ແຂວງ, ​ໂຄສະນາອົບຮົ​ມ​ເມືອງ, ນາຍບ້ານ-ຮອງ​ນາຍບ້ານ, ​ແນວ​ໂຮມ, ສະຫະພັນ​ແມ່ຍິງ, ຄູ​ສອນ, ​ແພດ, ປກສ-ປກຊ, ສະມາຊິກ​ພັກ ​ແລະ ປະຊາຊົນ​ພາຍ​ໃນ​ກຸ່ມ​ບ້ານ​ເນີນ​ສະຫວ່າງ ​ເຂົ້າ​ຮ່ວມ​ທັງ​ໝົດ 53 ທ່ານ, ຍິງ 9 ທ່ານ. ສະມາຊິກ​ພັກ 22 ສະຫາຍ, ຍິງ 3 ສະຫາຍ.

        ຈຸດປະສົງການຈັດ​ຝຶກ​ອົບຮົມ​ໃນ​ຄັ້ງ​ນີ້​ແມ່ນ​ເພື່ອ ​ເຮັດ​ໃຫ້​ສະມາຊິກ​ພັກ, ​ພະນັກງານ, ແນວ​ໂຮມ​ຕະຫຼອດ​ຮອດ​ພໍ່​ແມ່​ປະຊາຊົນ​ບັນດາ​ເຜົ່າ​ພາຍ​ໃນ​ບ້ານ ​ແລະ ປະຊາຊົນ​ທີ່ຢູ່​ລຽບ​ຕາມ​ຊາຍ​ແດນ ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ການ​ເຊື່ອມ​ຊືມ​ແນວທາງ​ນະ​ໂຍບາຍ​ຂອງ​ພັກ, ລະບຽບ​ກົດໝາຍ​ຂອງ​ລັດ, ການ​ເພີ່ມ​ທະວີ​ນໍ້າ​ໃນ​ຄວາມ​ຮັກ​ຊາດ​ສາມັກຄີ​ປອງ​ດອງ​ກັບ​ເຜົ່າ​ຕ່າງໆ​, ຍົກ​ສູງ​ສະຕິ​ສະ​ວັງ​ຕົວ​ໃຫ້​ສູງ. ​ເຂົ້າ​ໃຈ​ເຖິງ​ຄວາມ​ອຸດົມສົມບູນ​ທາງ​ດ້ານ​ຊັບພະຍາກອນ​ທໍາ​ມະ​ຊາດ ​ພູມ​ສາດ​ການ​ເມືອງ​ທີ່​ສໍາຄັນ​ຂອງ​ຊາດ​ລາວ.

        ຊຸດ​ຝຶກ​ອົບຮົມ​ໃນ​ຄັ້ງ​ນີ້​ໄດ້​ດໍາ​ເນີນ​ໄປ 3 ວັນ, ​ໃຊ້​ເວລາ 24 ຊົ່ວ​ໂມງ ​ແລະ ບົດຮຽນ​ທີ່​ນຳ​ມາ​ຝຶກ​ອົບ ຮົມໃນ​ຄັ້ງ​ນີ້​ແມ່ນ​ລວມມີ 6 ບົດ​ຄື: ຊາດ​ລາວ​, ຄົນ​ລາວ ​ແລະ ມູນ​ເຊື້ອ​ອັນ​ສະຫງ່າ​ລາສີ​ຂອງ​ປະຊາຊົນ​ລາວ, ລະບົບ​ການ​ເມືອງ ​​ແລະ ການ​ປົກຄອງ​ໃນ​ລະບອບ​ປະຊາທິປະ​ໄຕ​ປະຊາຊົນ, ຍົກ​ສູງ​ຄວາມ​ສາມາດ​ນໍາພາ​ຂອງ​ໜ່ວຍ​ພັກ​ບ້ານ, ສ້າງ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ ​ແລະ ໜັກ​ແໜ້ນ, ສ້າງ​ບ້ານ​ເປັນ​ຫົວໜ່ວຍ​ພັດທະນາ, ການ​ແກ້​ໄຂ​ຄວາມທຸກ​ຍາກ ​ແລະ ການ​ຜະລິດ​​ເປັນ​ສິນ​ຄ້າ, ເອກະສານ​ອົບຮົມ​ປະຊາຊົນ​ບັນດາ​ເຜົ່າ​ຢູ່​ຮາກ​ຖານ ​ແລະ ລຽບ​ຕາມ​ຊາຍ​ແດນ.

        ຜ່ານ​ການ​ຝຶກ​ອົບຮົມ​ເອກະສານ 6 ບົດ​ໃນ​ຄັ້ງ​ນີ້​ກໍ່​ເພື່ອ​ເປັນ​ການ​ບໍາລຸງ​ຍົກ​ລະດັບ​ຄວາມ​ຮູ້, ຄວາມ​ສາມາດ​ໃຫ້​ແກ່​ປະຊາຊົນ​ຂັ້ນ​ກຸ່ມ​ບ້ານ​ໃຫ້​ມີ​ຄວາມ​ຮັບຮູ້ອັນ​ໃໝ່. ​ເປັນ​ການ​ປັບປຸງ​ດ້ານ​ຈິນຕະນາການ, ຫັນ ປ່ຽນ​ແນວ​ຄິດ​ອັນ​ເກົ່າ​ໄປ​ສູ່​ການ​ກະທໍາ​ອັນ​ໃໝ່ ບັນຍາກາດ​ຟົດ​ຟື້ນ​ມ່ວນ​ຊື່ນ​ດີ ນັກ​ວິທະຍາ ກອນ ​ແລະ ສໍາ​ມະ​ນາກ​ອນ​ໄດ້​ມີ​ສ່ວນ​ຮ່ວມ​ໃນ​ການ​ແລກປ່ຽນ​ຄໍາ​ຄິດ​ເຫັນ​ເຊິ່ງກັນ ​ແລະ ກັນ, ສາມາດ​ຕີ​ລາຄາ​ຄວາມ​ຮັບຮູ້-​ເຂົ້າ​ໃຈ​ຂອງ​ນັກ​ສໍາ​ມະ​ນາກ​ອນ​ໄດ້ 95%.

        ນອກຈາກ​ນັ້ນ​ກໍ່​ຍັງ​ໄດ້​ລົງ​ກອງ​ໂຄສະນາ​ເຄື່ອນ​ທີ່​ໄປ​ພ້ອມ​ກັນ 2 ຈຸດ​ຄື: 1 ຢູ່​ເດີ່ນ​ໂຮງຮຽນ​ມັດທະ​ຍົມ​ສົມບູນ​ກຸ່ມ​ບ້ານ​ເນີນ​ສະຫວ່າງ, 2 ສະ​ໂມ​ສອນ​ບ້ານ​ໂພນ​ສີ ຫ່າງ​ຈາກ ບ້ານ​ເນີນ​ສະຫວ່າງ 19 ກິ​ໂລ​ແມັດ. ມີ​ຜູ້​ເຂົ້າ​ຮັບ​ຊົມ​ທັງ​ໝົດ 121 ຄົນ, ຍິງ 47 ຄົນ.

                   ​ໃນ​ຕອນ​ບ່າຍ​ຂອງ​ວັນ​ທີ 2 ​ເມສາ​ກໍ່​ໄດ້​ຈັດ​ພິທີ ມອບ-ຮັບ​ໃບ​ຢັ້ງ​ຢືນ​ເພື່ອ​ເປັນ​ຫຼັກ​ຖານ​ໃນ​ການ​ຝຶກ​ອົບຮົມ​ໃນ​ຄັ້ງ​ນີ້ ​ແລະ ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ທ່ານ ບຸນ​ທີ ມະນີ​ວົງ ​ເຊິ່ງທ່ານ​ໄດ້​ສ່ອງ​ແສງ​ໃຫ້​​ເຫັນ​ໜ້າ​ທີ່​ຂອງ​ແຕ່​ລະ​ອົງການ​ຈັດ​ຕັ້ງ​ຂອງ​ກຸ່ມ​ບ້ານ, ພາລະ​ບົດບາດ​ວຽກ​ທີ່​ຕົນ​ເຮັດ ​ແລະ ຮັບ​ຜິດ​ຊອບ​ຢູ່​ໃຫ້​ມີ​ຄວາມ​ເຂັ້ມ​ແຂງ ​ແລະ ພາ​ວິ​ໄສ, ພ້ອມ​ທັງ​ວິທີ​ແກ້​ໄຂ​ຄວາມທຸກ​ຢາກ​ແກ່​ປະຊາຊົນ ​ແລະ ປະກົດ​ການ​ຫຍໍ້​ທໍ້​ຕ່າງໆ​ທີ່​ເກີດ​ຂື້ນ​ພາຍ​ໃນ​ບ້ານ​ຂອງ​ຕົນ ​ເພິ່ນ​ຍັງ​ຍົກ​ໃຫ້​ເຫັນ​ກ່ຽວ​ກັບ​ຄວາມ​ເປັນ​ຫ່ວງ​ເປັນ​ໄຍຂອງ​ຂັ້ນ​ເທິງ​ທີ່​ລົງ​ມາ​ສຸມ​ໃສ່​ກຸ່ມ​ບ້ານ​ເນີນ​ສະຫວ່າງ​ໃຫ້​ໄປ​ຕາມ​ທິດ​ທາງຂອງ​ພັກ-ລັດ ໃຫ້​ມີ​ລັກສະນະ​ສືບ​ທອດ ​ແລະ ມີ​ລັກສະນະ​ນໍາ ​ເພື່ອ​ຈະ​ນໍາພາ​ບ້ານ​ລຸດພົ້ນ​ອອກ​ຈາກ​ຄອບຄົວ​ທຸກ​ຢາກ​ຢ່າງ​ສົມບູນ.

• < ຕໍ່ໄປ
• ຕໍ່ໄປ >