ຄະນະບໍລິຫານງານພັກເມືອງໂພນໄຊ ເຊື່ອມຊຶມ ແລະຜັນຂະຫຍາຍມະຕິຂອງພັກ

ລາຍລະອຽດ

ສ້າງຂື້ນເມື່ອ ວັນສຸກ, 25 ມີຖຸນາ 2021 03:21

ຂຽນໂດຍ ສີປະເສີດ ພົມມະຈັນ

ໃນລະຫວ່າງວັນທີ 17-18 ມິຖຸນາ 2021 ນີ້ ຢູ່ສະໂມສອນໃຫຍ່ ຂອງເມືອງໂພນ​ໄຊ ໄດ້ຈັດກອງປະຊຸມເຜີຍແຜ່, ມະຕິກອງປະຊຸມໃຫຍ່ XI ຂອງພັກ, ມະຕິ VIII ຂອງອົງພັກແຂວງຫຼວງພະບາງ ແລະມະຕິ IX  ຂອງອົງຄະນະພັກເມືອງໂພນໄຊ

ມີ ສະຫາຍ ຄຳຫຼ້າ ລຽນປະດິດ ກຳມະການປະຈຳພັກແຂວງ, ຫົວຫນ້າຄະນະກວດກາແຂວງ, ສະຫາຍ ທອງຈັນ ລັດຕະນະປະດິດ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງໂພນໄຊ, ​ຄະ​ນະ​​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ຄະ​ນະ​ພະ​ແນກ​ໂຍ​ທາ​ທິ​ການ ແລະ ຂົນ​ສົ່ງ​ແຂວງ ພ້ອມດ້ວຍ ກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າກອງບັນຊາການ-ຫ້ອງການອ້ອມຂ້າງເມືອງ ເຂົ້າຮ່ວມ ລວມ​ທັງ​ໝົດ 67 ສະ​ຫາຍ; ຍິງ 6 ສະ​ຫາຍ.

ພິທີ ໄດ້ຮັບຟັງການເຜີຍແຜ່ ມະຕິກອງປະຊຸມໃຫຍ່ ສະໄໝ XI ຂອງພັກ, ມະຕິ VIII ຂອງອົງພັກແຂວງຫຼວງພະບາງ ແລະ ມະຕິ IX ຂອງອົງຄະນະພັກເມືອງໂພນໄຊ ເພື່ອປະຕິບັດເນື້ອໃນຂອງມະຕິກົມການເມືອງສູນກາງພັກ, ກໍ່ຄືແຜນພັດທະນາເສດຖະກິດ-ສັງຄົມໃນໄລຍະ 5 ປີ ຂອງແຂວງຫຼວງພະບາງ ໂດຍສະເພາະ ແຜນພັດທະນາເສດທະກິດ-ສັງຄົມ 5 ປີ ຂອງເມືອງ ແລະຕີລາຄາຄືນ ຄວາມຮັບຜິດຊອບໜ້າທີ່ການເມືອງ, ການຈັດຕັ້ງປະຕິບັດວຽກງານ ແຕ່ລະຂົງເຂດວຽກງານໃນໄລຍະຜ່ານມາ, ການກຳນົດທິດທາງແຜນການວຽກງານຈຸດສຸມ, ຄາດໝາຍສູ້ຊົນ ຕ້ອງເຮັດບັນລຸຕາມແຜນການທີ່ວາງໄວ້, ການແບ່ງງານ ແບ່ງຄວາມຮັບຜິດຊອບ ໃຫ້ຄະນະພັກແຕ່ລະຂັ້ນ ເພື່ອຍົກສູງຄຸນນະພາບ, ສ້າງການຫັນປ່ຽນໃໝ່ແບບແຜນ ແລະວິທີການນໍາພາ ຂອງຄະນະພັກແຕ່ລະຂັ້ນ ໃຫ້ມີປະສິດພາບສູງກວ່າເກົ່າ, ເສີມຂະຫຍາຍປະຊາທິປະໄຕ ໃຫ້ຄະນະພັກແຕ່ລະຂັ້ນ ໄດ້ຮັບຮູ້ການເຄື່ອນໄຫວນໍາພາລວມ ແລະຄວາມຮັບຜິດຊອບການເມືອງ, ທີ່ໄດ້ຮັບການມອບໝາຍ ຂອງຄະນະພັກແຕ່ລະຂັ້ນ ເພື່ອເສີມຂະຫຍາຍດ້ານດີທີຕັ້ງໜ້າ ແລະແກ້ໄຂຈຸດອ່ອນຂໍ້ຄົງຄ້າງ ໃຫ້ທັນກັບສະພາບການຄວາມເປັນຈິງໃນແຕ່ລະຂົງເຂດ ຄວາມຮັບຜິດຊອບຂອງຕົນ. ​ບັນ​ດາ​ຜູ້​ແທນກອງ​ປະ​ຊຸມ ໄດ້​ປະ​ກອບ​ຄຳ​ຄິດ-ຄຳ​ເຫັນ ຕໍ່​ກອງ​ປະ​ຊຸມ​ຢ່າງ​ກົງ​ໄປ, ກົງ​ມາ ເພື່ອ​ຕີ​ລາ​ຄາ​ຄືນ​ໝາກ​ຜົນ, ຂໍ້​ຄົງ​ຄ້າງ ໃນ​ການ​ຈັດ​ຕັ້ງ​ຜັນ​ຂະ​ຫຍາຍ​ບັນ​ດາ​ມະ​ຕິ​ດັ່ງ​ໃນໄລຍະຜ່ານ​ມາ ແລະ​​ຄົ້ນ​ຄວ້າ​ຊອກ​ຫາ​ທິດ​ທາງ​ແກ້​ໄຂ​ຈຸດ​ຄົງ​ຄ້າງ​ໃນ​ຕໍ່​ໜ້າ ການ​ປະ​ກອບ​ຄຳ​ເຫັນ​ໃສ່​ບັນ​ດາ​ວຽກ​ງານ​ກະ​ສິ​ກຳ ເປັນ​ຕົ້ນ​ແມ່ນ ການ​ປູກ​ຜັກ​ປອດ​ສານ​ຜິດ, ການ​ລ້ຽງ​ສັດ​ປະ​ເພດ​ງົວ, ຄວາຍ​ເພື່ອ​ສົ່ງ​ອອກ ສ້າງ​ລາຍ​ຮັບ​ໜັ້ນ​ທ່ຽງ ໃຫ້​ແກ່​ປະ​ຊາ​ຊົນ​ບັນ​ດາ​ເຜົ່າ, ວຽກ​ງານ​ການ​ຄ້າ ເພື່ອ​ຊອກ​ຫາ​ຕະຫຼາດ​ຮອງ​ຮັບ​ຜົນ​ຜະ​ລິດ ຂອງ​ປະ​ຊາ​ຊົນ, ຄົ້ນ​ຄວ້າ​ຊອກ​ແຫຼ່ງ​ທຶນ​ຈາກ​ພາກ​ສ່ວນ​ຕ່າງໆ ມາ​ສະ​ໜອງ ໃຫ້​ປະ​ຊາ​ຊົນ​ນຳ​ໃຊ້​ເຂົ້າ​ໃນ​ການ​ຜະ​ລິດ ແລະ​ເພື່ອ​ການກໍ່​ສ້າງ​ພື້ນ​ຖານ​ໂຄງ​ລ່າງ​ທີ່​ຈຳ​ເປັນ, ວຽກ​ງານ​ວັດ​ທະ​ນະ​ທຳ​ສັງ​ຄົມ ໄດ້​ສຸມ​ໃສ່​ບັນ​ລຸ​ສະ​ຫະ​ສະ​ຫວັດ ຂອງວຽກ​ງານ​ສາ​ທາ​ລະ​ນະ​ສຸກ, ວຽກ​ງານ​ສຶກ​ສາ, ຂົງ​ເຂດ​ວຽກ​ງານ​ລະ​ບົບ​ການ​ເມືອງ​ແມ່ນ​ເໜັ້ນ​ໃສ່​ການ​ປັບ​ປຸງ, ກໍ່​ສ້າງວຽກ​ພັກ-ພະ​ນັກ​ງານ, ການ​ສ້າງ​ໜ່ວຍ​ພັກ​ປອດ​ໃສ, ເຂັ້ມ​ແຂງ ແລະ​ໜັກ​ແໜ້ນ ແລະ​ຂົງ​ເຂດ​ວຽກ​ງານ​ປົກ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ ແມ່ນ​ສຸມ​ໃສ່​ການ​ແກ້​ໄຂ​ປະ​ກົດ​ການ​ຫຍໍ້​ທໍ້​ໃນ​ສັງ​ຄົມ.

ໂອກາດນີ້ ສະຫາຍ ຄຳຫຼ້າ ລຽນປະດິດ ໄດ້ມີຄຳເຫັນຍ້ອງຍໍຊົມເຊີຍ ຜົນງານທີ່ອົງຄະນະພັກເມືອງໂພນໄຊ ຍາດມາໄດ້ ໃນໄລຍະຕົ້ນ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ທັງໄດ້ຊີ້ນໍາໃຫ້ສືບຕໍ່ ເອົາໃຈໃສ່ບາງວຽກງານຕື່ມ ເປັນຕົ້ນ ການສັງລວມບັນຫາປະກົດການຫຍໍ້ທໍ້ ທີ່ເກີດຊື້ນຢູ່ພາຍໃນເມືອງ ເພື່ອແກ້ໄຂໃຫ້ທັນການ, ເພີ່ມທະວີການຕ້ານ ແລະສະກັດກັ້ນພະຍາດໂຄວິດ 19, ຊຸກຍູ້ສົ່ງເສີມ ໃຫ້ມີຄອບຄົວຕົວແບບການປູກຝັງລ້ຽງສັດໃຫ້ຫຼາຍ, ຕັ້ງໜ້າສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະຈັດຕັ້ງປະຕິບັດແຜນການ 5 ປີ ຂອງແຕ່ລະຂົງເຂດວຽກງານ ໃຫ້ໄດ້ຮັບຜົນດີ.

• < ຕໍ່ໄປ
• ຕໍ່ໄປ >