ສ້າງຂະບວນການຕ້ອນຮັບວັນຄ້າຍວັນເກີດ ປະທານສຸພານຸວົງ ຄົບຮອບ 112 ປີ.

ລາຍລະອຽດ

ສ້າງຂື້ນເມື່ອ ວັນຈັນ, 05 ກໍລະກົດ 2021 08:15

ໃນຕອນແລງ ວັນທີ 01 ກໍລະກົດ 2021 ຜ່ານມານີ້ ໜ່ວຍຊາວໜຸ່ມຮາກຖານຄະນະໂຄາສະນາອົບຮົມແຂວງ ຮ່ວມກັບ ໜ່ວຍຊາວໜຸ່ມຮາກຖານພະແນກພາຍໃນແຂວງ ໄດ້ຈັດການແຂ່ງຂັນກິລາບານເຕະຂຶ້ນຢ່າງເປັນທາງການ ຢູ່ທີ່ ເດີນກິລາບານເຕະພູທອງ ບ້ານໂພນອາດ ນະຄອນຫຼວງພະບາງ ແຂວງຫຼວງພະບາງ.

ເພື່ອເປັນການສ້າງຂະບວນການຕ້ອນຮັບວັນຄ້າຍວັນເກີດ ຂອງປະທານສຸພານຸວົງ ຄົບຮອບ 112 ປີ (13.07.1909 – 13.07.2021) ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ໃຫ້ກຽດເຂົ້າຮ່ວມມີບັນດາສະຫາຍຄະນະພັກ-ຄະນະນຳ, ຕາງໜ້າອົງການຈັດຕັ້ງຊາວໜຸ່ມ, ແມ່ຍິງ, ກໍາມະບານ ພ້ອມດ້ວຍນັກກິລາທັງສອງຝ່າຍເຂົ້າຮ່ວມ.

ໃນພິທີ ຕາງໜ້າ 02 ໜ່ວຍຊາວໜຸ່ມ ໄດ້ຜ່ານຈຸດປະສົງ, ຄາດໝາຍ ແລະ ເນື້ອໃນຄວາມໝາຍຄວາມສຳຄັນ ຂອງກິດຈະກໍາການສ້າງຂະບວນການ ແລະ ເພື່ອຮັດແໜ້ນຄວາມສາມັກຄີ ລະຫວ່າງ ໜ່ວຍຊາວໜຸ່ມຮາກຖານຄະນະໂຄສະນາອົບຮົມແຂວງ ກັບ ໜ່ວຍຊາວໜຸ່ມພະແນກພາຍໃນແຂວງ ກໍ່ຄື ຄະນະໂຄສະນາອົບຮົມແຂວງ ກັບ ພະແນກພາຍໃນແຂວງ.

ຜ່ານການສ້າງກິດຈະກຳບານເຕະດັ່ງກ່າວ ເຫັນວ່ານັກກິລາທັງ 02 ໜ່ວຍຊາວໜຸ່ມ ແມ່ນມີນໍ້າໃຈນັກກິລາສູ້ຢ່າງເຕັມທີ່, ເຕັມໄປດ້ວຍໄມຕີຈິດມິດຕະພາບ ສະແດງເຖິງຄວາມສາມັກຄີຮັກແພງ ລະຫວ່າງ 2 ໜ່ວຍຊາວໜຸ່ມ ກໍ່ຄື ພະນັກງານອ້າຍນ້ອງ 2 ອົງການຈັດຕັ້ງ ຄະນະໂຄສະນາອົບຮົມແຂວງ ກັບ ພະແນກພາຍໃນແຂວງ.

ບັນນາທິການຂ່າວ ຄອຂ ບຸນຈັນ ກັນຍາວົງ                                                              ຜູ້ຂຽນ ສີປະເສີດ ພົມມະຈັນ

• < ຕໍ່ໄປ
• ຕໍ່ໄປ >