ສະເຫຼີມສະຫຼອງວັນສ້າງຕັ້ງຫະພັນແມ່ຍິງລາວ ຄົບຮອບ 67 ປີ

ລາຍລະອຽດ

ສ້າງຂື້ນເມື່ອ ວັນຈັນ, 01 ສິງຫາ 2022 09:19

ຂຽນໂດຍ ສີ​ປະ​ເສີດ

ສະເຫຼີມສະຫຼອງວັນສ້າງຕັ້ງຫະພັນແມ່ຍິງລາວ ຄົບຮອບ 67 ປີ

ຕອນເຊົ້າວັນທີ 18 ກໍລະກົດ 2022 ທີ່ສະໂມສອນໃຫຍ່ນະຄອນຫລວງພະບາງ ມີພິທີຈັດຕັ້ງໂຮມຊຸມນຸມຂຶ້ນ ພາຍໃຕ້ການເປັນປະທານຂອງສະຫາຍ ນາງ ວຽນວິໄລ ດີລະພັນ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີສະຫາຍ ວຽງທອງ ຫັດສະຈັນ ກຳມະການປະຈຳພັກແຂວງ ເລຂາພັກນະຄອນ, ເຈົ້ານະຄອນຫລວງພະບາງ, ສະຫາຍນາງ ສີລິພອນ ສຸພັນທອງ ກຳມະການປະຈຳພັກແຂວງ

ຮອງເຈົ້າແຂວງ ຫຼວງພະບາງ. ມີບັນດາຄະນະບໍລິຫານງານສະຫະພັນແມ່ຍິງແຂວງ ສະໄໝທີ IX,  ມີບັນດາຄະນະໜ່ວຍຮາກຖານສະຫະພັນແມ່ຍິງອ້ອມຂ້າງແຂວງ,ນອນຄອນ ແລະ ພັນລະຍາຂອງການນຳແຂວງ, ນະຄອນ, ພະນັກງານອາວຸໂສ-ບຳນານ ເຂົ້າຮ່ວມຢ່າງພ້ອມພຽງ.
ພິທີແມ່ນໄດ້ຮັບຊົມການສະແດງສີລະປະວັນນະຄະດີບົດຝ້ອນ 5 ລາຍການຈາກເອື້ອຍນ້ອງແມ່ຍິງບ້ານມະໂນ ນະຄອນ-ຫລວງພະບາງ ດ້ວຍບັນຍາກາດເບີກບານມ່ວນຊື່ນ, ໃນວາລະພິທີ ສະຫາຍ ນາງ ອິນທະວອນ ພົມມະຈັນ ຂຶ້ນຜ່ານຜົນງານການຈັດຕັ້ງປະຕິບັດວຽກງານສະຫະພັນແມ່ຍິງແຂວງ ໃນໄລຍະ 1 ປີ ຜ່ານມາ ເຊິ່ງເນື້ອໃນໄດ້ສ່ອງແສງເຖິງການຕີລາຄາວຽກງານການເມືອງ-ແນວຄິດ, ວຽກງານການຈັດຕັ້ງ, ແບບແຜນການນຳພາ ແລະ ວິທີເຮັດວຽກ, ໜ້າທີ່ຄວາມຮັບຜິດຊອບການເມືອງ ຂອງສະພັນແມ່ຍິງແຂວງ ຕິດພັນກັບມະຕິ ກອງປະຊຸມໃຫຍ່ ຄັ້ງທີ IX ຂອງສະຫະພັນແມ່ຍິງແຂວງວາງອອກ, ສືບຕໍ່ຜັນຂະຫຍາຍ ວຽກງານ 3 ດີ ເຂົ້າສູ່ລວງເລິກ, ຕິດພັນກັບການຜັນຂະຫຍາຍເຊື່ອມຊຶມ 2 ວາລະແຫ່ງຊາດ ເວົ້າລວມ, ເວົ້າສະເພາະ ໄລຍະ 1 ປີ ຜ່ານມາ ສະຫະພັນແມ່ຍິງແຂວງ ໄດ້ມີຜົນສຳເລັດ ແລະ ມີຜົນງານຫລາຍດ້ານເປັນຕົ້ນແມ່ນການຈັດຕັ້ງປະຕິບັດກົດໝາຍ, ປົກປ້ອງສິດ ແລະ ຜົນປະໂຫຍດຂອງເດັກນ້ອຍ ແລະ ແມ່ຍິງລາວຢ່າງເປັນລະບົບ, ໄດ້ປະກອບສ່ວນຊ່ວຍສັງຄົມ ໃນການຮັບບໍລິຈາກເລືອດ, ລະດົມອຸປະກອນງົບປະມານຕ່າງໆຊ່ວຍເຫຼືອໄພພິບັດທາງທຳມະຊາດ, ຊ່ວຍເຫຼືອເດັກນ້ອຍຜູ້ດ້ອຍໂອກາດໃຫ້ເຂົາເຈົ້າໄດ້ຮັບການສຶກສາໃນເກນອາຍຸເຂົ້າຮຽນ, ຊຸກຍູ້ຝຶກອົບຮົມວິຊາຊີບໃຫ້ເອື້ອຍນ້ອງແມ່ຍິງພາຍໃນແຂວງ, ຊຸກຍູ້ຊ່ວຍເຫຼືອກຳລັງປ້ອງກັນຊາດ-ປ້ອງກັນຄວາມສະຫງົບໃນການປະຕິບັດໜ້າທີ່ຢູ່ແນວໜ້າ ແລະ ອື່ນໆ ຕາມເງື່ອນໄຂທ່າແຮງຂອງສະຫະພັນແມ່ຍິງແຂວງ.
ພິທີໂຮມຊຸມນຸມໃນຄັ້ງນີ້ ໃຫ້ກຽດຂຶ້ນປາຖະກະຖາເລົ່າມູນເຊື້ຶອຂອງ ສະຫາຍ ນາງ ວຽງວິໄລ ດີລະພັນ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ ເຊິ່ງເນື້ອໃນດັ່ງກາ່ວໄດ້ຫວນຄືນປະຫວັດສາດອົງອາດກ້າຫານຂອງແມ່ຍິງລາວ ໃນຕ່ລະໄລຍະ ເປັນຕົ້ນໄລຍະຕໍ່ສູ້ຕ້ານຈັກກະພັດຝຣັ່ງ, ຈັກກະພັດອາເມລິກາ ແລະ ລູກແຫຼ່ງຕີນມືຂາຍຊາດ ໃນໄລຍະຕໍ່ສູ້ກູ້ຊາດ, ເນື້ອໃນຈິດໃຈຄວາມໝາຍຄວາມສຳຄັນ ຂອງການສ້າງຕັ້ງສະຫະພັນແມ່ຍິງລາວຂຶ້ນ ໃນຄັ້ງ ວັນທີ 20 ກໍລະກົດ 1955 ເພື່ອເປັນການສັນລະເສີນຜົນງານຄວາມເອກອ້າງທະນົງໃຈຂອງແມ່ຍິງລາວ, ທີ່ໄດ້ປະກອບສ່ວນເຂົ້າໃນໜ້າທີ່ການເມືອງຂອງພັກ-ລັດ ແຕ່ລະໄລຍະໃຫ້ສອດຄ່ອງກັບແນວທາງຂອງພັກວາງອອກ, ໃນນັ້ນຜົນງານການເຄື່ອນໄຫວຂອງແມ່ຍິງແຕ່ລະຂັ້ນ, ແຕ່ລະໄລຍະທີ່ພັກ-ລັດຖະບານໄດ້ບັນທຶກເຂົ້າໃນປະຫວັດສາດ ກໍ່ຄື ການປະກອບສ່ອນເຂົ້າໃນການພັດທະນາປະເທດຊາດ ເພື່ຶອເປັນຂໍ້ມູນໃຫ້ແກ່ຄົນຮຸ່ນໃໝ່ໄດ້ສຶກສາຄົ້ນຄວ້າ ແລະ ສືບທອດຮ່ຳຮຽນເອົາ ແລະ ເພື່ອເປັນແວ່ນແຍ້ງອັນໃສແຈ້ງ, ເປັນມູນເຊື້ອທີ່ຕິດພັນກັບການດຳລົງຊີວິດປະຈຳວັນ, ເປັນບ່ອນອີງໃຫ້ແກ່ແມ່ຍິງລາວໃນການໝູນໃຊ້ເຂົ້າໃນການດຳລົງຊີວິດຕົວຈິງເພື່ອປະກອບສ່ວນເຂົ້າໃນສັງຄົມ, ເປັນປະຫວັດສາດທີ່ມີການສືບຕໍ່ເສີມຂະຫຍາຍໃຫ້ສອດຄ່ອງກັບລະບຽບກົດໝາຍຂອງພັກ-ລັດວາງອອກ ແລະ ທັງເປັນການເຕົ້າໂຮມຄວາມສາມັກຄີຮັກແພງກັບປະຊາຊົນບັນດາເຜົ່າໃນຂອບເຂດທົ່ວປະເທດ ກໍ່ຄື ແຂວງຫລວງພະບາງຂອງພວກເຮົາ.
ທ້າຍພິທີ ສະຫາຍ ນາງ ວຽນວິໄລ ດີລະພັນ ໄດ້ຍ້ອງຍໍຊົມເຊີຍຜົນງານທີ່ສະຫະພັນແມ່ຍິງແຂວງຍາດມາໄດ້ ໃນໄລຍະ 1 ປີ ຜ່ານມາ, ໃນນັ້ນຍັງໄດ້ແລກປ່ຽນຄຳຄິດຄຳເຫັນເໜັ້ນໜັກໃຫ້ຄະນະບໍລິຫານງານສະຫະພັນແມ່ຍິງແຂວງ ສະໄໜທີ IX, ຕາງໜ້າຄະນະໜ່ວຍຮາກຖານສະຫະພັນແມ່ຍິງອ້ອມຂ້າງແຂວງໃຫ້ສືບຕໍ່ເສີມຂະຫຍາຍວຽກງານແມ່ຍິງລາວ ໃຫ້ສອດຄ່ອງກັບ 4 ບຸກທະລຸ ຂອງພັກວາງອອກ ຕິດພັນໂດຍກົງກັບ ຂໍ້ແຂ່ງຂັນແມ່ຍິງ 3 ດີ ຕາມມາດຖານເງື່ອນໄຂຕົວຈິງຂອງແຕ່ລະບ່ອນ ດ້ວຍແນວຄິດບຸກທະລຸ ດ້ານຈິນຕະນາການທີມີລັກສະນະວິທະຍາສາດ ສອດຄ່ອງກັບຮີດຄອງປະເພນີຂອງບັນດາເຜົ່າ, ຂອງຊາດ ຕາມລະບຽບກົດໝາຍ ຢ່າງເປັນລະບົບ, ໃຫ້ສົມຄູ່ກັບນາມມະຍົດ ແລະ ໜ້າທີ່ການເມືອງຂອງພັກ-ລັດໄດ້ມອບໝາຍໃຫ້ ດ້ວຍຈິດໃຈອັນປອດໃສ, ເຂັ້ມແຂງ ແລະ ໜັກແໜັ້ນ.

• < ຕໍ່ໄປ
• ຕໍ່ໄປ >