ເຊື່ອມຊືມເອກະສານບັນຫາພື້ນຖານກ່ຽວກັບວຽກງານ ສັງລວມ-ເກັບກຳຫາງສຽງສັງຄົມ

ສ້າງຂື້ນເມື່ອ ວັນພຸດ, 14 ກັນຍາ 2022 03:10
ຂຽນໂດຍ ສົມນຶກ ຈະເລີນສີ

ຄະນະໂຄສະນາອົບຮົມແຂວງລົງເຜີຍແຜ່, ເຊື່ອມຊືມເອກະສານບັນຫາພື້ນຖານກ່ຽວກັບວຽກງານ ສັງລວມ-ເກັບກຳຫາງສຽງສັງຄົມ ຢູ່ພະແນກສຶກສາທິການ ແລະກິລາແຂວງຫຼວງພະບາງ

ໃນຕອນເຊົ້າ ຂອງວັນທີ 9 ກັນຍາ 2022 ນີ້ ຢູ່ທີ່ຫ້ອງປະຊຸມ ພະແນກສຶກສາທິການ ແລະກິລາແຂວງຫຼວງພະບາງ; ທ່ານ ນາງ ວຽນວິໄລ ດີລະພັນ ກຳມະການປະຈຳພັກແຂວງ ສະມາຊິດສະພາແຫ່ງຊາດ, ຫົວໜ້າຄະນະໂຄສະນາອົບຮົມແຂວງຫຼວງພະບາງ ພ້ອມດ້ວຍທິມງານໄດ້

ລົງເຄື່ອນໄຫວເຜີຍແຜ່, ເຊື່ອມຊຶມ ຄໍາສັ່ງແນະນໍາ ຂອງຄະນະປະຈໍາພັກແຂວງ ສະບັບເລກທີ 06/ຄປພຂ-ຫຼບ, ລົງວັນທີ 31 ສິງຫາ 2017 ວ່າດ້ວຍການເພີ່ມທະວີວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ ແລະເອກະສານ ບັນກາພື້ນຖານກ່ຽວກັບວຽກງານສັງລວມ-ເກັບກຳຫາງສຽງສັງຄົມ ຢູ່ພະແນກສຶກສາທິການ ແລະກິລາແຂວງ ໂດຍມີ ທ່ານ ປ.ອ ວົງເພັດ ອຸດົມລິດ ກຳມະການພັກແຂວງ, ສະມາຊິກສະພາແຫ່ງຊາດ, ຫົວໜ້າພະແນກສຶກສາທິການ ແລະກິລາແຂວງ , ມີຄະນະພັກຮາກຖານພ້ອມດ້ວຍຫົວໜ້າ-ຮອງຫົວໜ້າຂະແໜງຕະຫຼອດຮອດ ສະມາຊິກພັກ, ພະນັກງານ-ລັດຖະກອນເຂົ້າຮ່ວມຮັບຟັງຢ່າງພ້ອມພຽງ.

ພິທີດັ່ງກ່າວ ທ່ານ ນາງ ຈັນສຸກ ວິໄລພອນ ຫົວໜ້າຂະແໜງຄົ້ນຄວ້າສັງລວມ-ເກັບກຳຫາງສຽງສັງຄົມ ຂອງຄະນະໂຄສະນາອົບຮົມແຂວງ ກໍ່ໄດ້ຂື້ນຜ່ານຄຳສັ່ງແນະນຳ ຂອງຄະນະປະຈໍາພັກແຂວງ ສະບັບເລກທີ 06/ຄປພຂ-ຫຼບ ລົງວັນທີ 31 ສິງຫາ 2017 ວ່າດ້ວຍການເພີ່ມທະວີວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະໃໝ່, ເຊິ່ງໄດ້ຍົກໃຫ້ເຫັນຄວາມໝາຍຄວາມສຳຄັນ,​ ຈຸດປະສົງ, ​ເນື້ອໃນ ແລະວິທີການຈັດຕັ້ງປະຕິບັດ ວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມໃນໄລຍະໃໝ່,  ເພື່ອໃຫ້ຜູ້ເຂົ້າຮ່ວມຮັບຟັງມີຄວາມຮັບຮູ້ ແລະເຂົ້າໃຈ ໂດຍສະເພາະແມ່ນການຄົ້ນຄວ້າ,​ ວິເຄາະວິໄຈ ແລະຕີລາຄາສະພາບແນວຄິດ-ຫາງສຽງສັງຄົມທີ່ເກີດຂຶ້ນ ຢູ່ພາຍໃນສໍານັກງານອົງການໃຫ້ຖືກຕ້ອງ, ຄົ້ນຄວ້າຊອກຫາວິທີ່ແກ້ໄຂສິ່ງຫຍໍ້ທໍ້ ແລະວາງມາດຕະການສະກັດກັ້ນຢ່າງທັນການ.

ຈາກນັ້ນ, ທ່ານ ນາງ ວຽນວິໄລ ດີລະພັນ ກໍາມະການປະຈໍາພັກແຂວງ, ສະມາຊິກສະພາແຫ່ງຊາດ ຫົວໜ້າຄະນະໂຄສະນາອົົບຮົມແຂວງ ກໍໍ່ໄດ້ໃຫ້ກຽດເຜີຍແຜ່, ​ເຊື່່ອມຊືມ ເອກະສານບັນຫາພື້ນຖານກ່ຽວກັບວຽກງານສັງລວມ-ຫາງສຽງສັງຄົມ ເຊິ່ງໄດ້ຍົກໃຫ້ເຫັນບັນຫາ​ພື້ນຖານ ຂອງ​ວຽກງານ​ຫາງ​ສຽງ​ສັງຄົມ ໂດຍສະເພາະ​ແມ່ນຄວາມ​ສຳຄັນ, ພາລະ​ບົດບາດ, ຄຸນ​ລັກສະນະ, ປັດ​ໄຈກ່ຽວກັບບັນຫາຫາງ​ສຽງ​ສັງຄົມ, ການນໍາໃຊ້ຫາງສຽງສັງຄົມເຂົ້າໃນວຽກງານສຶກສາອົບຮົມການເມືອງ-ແນວຄິດ, ​ຄວາມ​ແຕກ​ຕ່າງ ລະຫວ່າງ ຫາງ​ສຽງສັງຄົມກັບ​ຂ່າວ​ລື ແລະຖ້ອຍທຳນອງບິດເບືອນ ທີ່ມີຕໍ່ການນຳພາ ຂອງພັກ ໃນການ ເຄື່ອນໄຫວຈັດຕັ້ງປະຕິບັດວຽກງານຕ່າງໆ ຢູ່ພາຍໃນການຈັດຕັ້ງ, ສໍານັກງານ-ກົມກອງ ແລະສັງຄົມ.

ຜ່ານການເຊື່ອມຊຶມໃນຄັ້ງນີ້ ແມ່ນຈະໄດ້ເປັນຄວາມຮູ້ພື້ນຖານ ໃຫ້ແກ່ສະມາຊິກພັກ, ພະນັກງານ-ລັດຖະກອນ ສາມາດຈຳແນກໄດ້, ທັງວິເຄາະວິໄຈກ່ຽວກັບບັນຫາຂ່າວລື, ຖ້ອຍທຳນອງບິດເບືອນ ແລະຫາງສຽງສັງຄົມ ເພື່ອຍົກສູງສະຕິລະວັງຕົວ ແລະຕອບຕ້ານຢ່າງທັນການ, ຮັບຮູ້, ເຂົ້າໃຈວ່າວຽກງານຫາງສຽງສັງຄົມແມ່ນວຽກງານໜ່ຶ່ງທີ່ສໍາຄັນຕິດພັນກັບວຽກງານການເມືອງ-ແນວຄິດທີ່ສອດຫ້ອຍເຂົ້າທຸກຂົງເຂດວຽກງານ, ແມ່ນໜຶ່ງທີ່ຍຸດທະສາດທາງດ້ານກະແສແນວຄິດ,​ ເປັນວຽກທີ່ຫຼໍ່ແຫຼມ ຢູ່ໃນສັງຄົມ ທຸກຄົນຕ້ອງມີສ່ວນຮ່ວມ, ກຳໄດ້ບັນດາປະກົດການຫຍໍ້ທໍ້ທີ່ເກີດຂື້ນຢູ່ພາຍໃນກົມກອງ, ທ້ອງ ຖິ່ນ ແລະສັງຄົມ ພ້ອມທັງແກ້ໄຂສິ່ງທີ່ບໍ່ຖືກຕ້ອງ ແລະເສີມຂະຫຍາຍສິ່ງທີ່ດີ, ສິ່ງສໍາຄັນ ແມ່ນເຂົ້າໃຈຕໍ່ວຽກງານຕິດຕາມ, ເກັບກຳສະພາບແນວຄິດຫາງສຽງ-ສັງຄົມ ໂດຍສະເພາະແມ່ນດ້ານຫຼັກການ, ທິດນໍາ, ວິທີ່ການເກັບກຳຫາງສຽສັັງຄົມທີ່ເກີດຈາກການນໍາພາຂອງພັກ ແລະການເຄື່ອນໄຫວວຽກງານຕ່າງໆ ຢູ່ໃນສັງຄົມ.