ເປີດຮຽນເອກະສານໃຫ້ມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າພັກປະຊາຊົນ ປະຕິວັດລາວ ຊຸດທີ VII ປະຈຳປີ 2022

ສ້າງຂື້ນເມື່ອ ວັນສຸກ, 23 ກັນຍາ 2022 03:30
ຂຽນໂດຍ ບຸນ​ມີ ໄຊ​ຍະ​ກຸມ​ມານ

ໃນລະຫວ່າງ ວັນທີ່ 21-22 ກັນຍາ 2022 ນີ້; ຢູ່ຫ້ອງປະຊຸມ ຂອງຄະນະໂຄສະນາອົບຮົມແຂວງ ຫລວງພະບາງ ໄດ້ເປີດພິທີຮຽນເອກະສານສະໜັບສະໜູນ ໃຫ້ແກ່ມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າເປັນສະມາຊິກ ພັກປະຊາຊົນ ປະຕິວັດລາວຊຸດທີ່ VII ປະຈໍາປີ 2022 ໂດຍເປັນປະທານຂອງ ທ່ານ ນາງ ວຽນວິໄລ ດີລະພັນ ກຳມະການປະຈຳພັກແຂວງ, ສະ​ມາ​ຊິກ​ສະ​ພາ​ແຫ່ງ​ຊາດ ປະ​ຈຳ​ເຂດ​ເລືອກ​ຕັ້ງ​ທີ່ 6 ຫົວຫນ້າຄະນະໂຄສະນາອົບຮົມແຂວງ, ມີວິທະຍາກອນ ແລະສຳມະນາກອນມາຈາກ ຄະນະພັກຮາກຖານພະແນກແຮງງານ-ສະຫວັດດີການ

ສັງຄົມແຂວງ, ຄະນະພັກຮາກຖານ ພະແນກການເງິນແຂວງ, ຄະນະພັກຮາກຖານ ພະແນກສາທາລະນະສຸກແຂວງ, ຄະນະພັກຮາກຖານ ພະແນກສຶກສາທິການ ແລະ ກິລາແຂວງ ແລະຄະນະພັກຮາກຖານ ມະຫາວິທະຍາໄລສຸພານຸວົງ, ເຂົ້າຮ່ວມທັງໝົດ 24 ສະຫາຍ, ຍິງ 16 ສະຫາຍ. ບົດຮຽນທີ່ອົບຮົມໃນຄັ້ງນີ້ ໄດ້ນໍາໃຊ້ເອກະສານຈາກ ຄະນະໂຄສະນາອົບຮົມສູນກາງພັກກຳນົດໃຫ້, ເຊິ່ງມີ 13 ຄໍາຖາມ 13 ຄຳຕອບ, ການຝຶກອົບຮົມຄັ້ງນີ້ ເພື່ອໃຫ້ມະຫາຊົນຜູ້ກ້າວໜ້າ ທີ່ຈະຂະຫຍາຍເຂົ້າເປັນ ສະມາຊິກພັກຮັບຮູ້ເບື້ອງຕົ້ນກ່ຽວກັບປະຫວັດ, ຄວາມເປັນມາ, ອຸດົມການ ແລະທາດແທ້ຂອງ ພັກປະຊາຊົນ ປະຕິວັດລາວ, ເຂົ້າໃຈກ່ຽວກັບມາດຖານ ແລະເງື່ອນໄຂຜູ້ທີ່ຈະຂະຫຍາຍເຂົ້າເປັນສະມາຊິກພັກ ປະຊາຊົນ ປະຕິວັດລາວ ແລະ ຜົນປະໂຫຍດຂອງສະມາຊິກພັກ ເຮັດໃຫ້ມະຫາຊົນຜູ້ກ້າວໜ້າ ມີຄວາມຮັບຮູ້, ເຂົ້າໃຈເລິກຕື່ມ ກ່ຽວກັບການກໍ່ສ້າງ ແລະຂະຫຍາຍພັກ, ກຳໄດ້ເນື້ອໃນ ພື້ນຖານ ແລະຫຼັກການລວມຂອງພັກ, ພ້ອມທັງຮັບຮູ້ສັງເກດຕີລາຄາ ແລະວິເຄາະບັນຫາໄດ້ໃນລະດັບໃດໜຶ່ງທີ່ແນ່ນອນ. ຕອນທ້າຍ ທ່ານ ນາງ ວຽນວິໄລ ດີລະພັນ ໄດ້ເນັ້ນໃຫ້ມະຫາຊົນຜູ້ກ້າວໜ້າ ເປົ້າໝາຍທີ່ຈະຂະຫຍາຍເຂົ້າ ພັກປະຊາຊົນ ປະຕິວັດລາວ ທີ່ໄດ້ເຂົ້າຮໍ່າຮຽນເອກະສານໃນຄັ້ງນີ້; ຈົ່ງນໍາເອົາບົດຮຽນໄປຝຶກຝົນຫຼໍ່ຫຼອມຕົນເອງ ໃຫ້ມີທັດສະນະຫຼັກໜັ້ນການເມືອງ ທີ່ໜັກແໜ້ນ, ມີຄຸນສົມບັດສິນທຳປະຕິວັດ, ມີແບບແຜນດໍາລົງຊິວິດທີ່ປອດໃສ ຂາວສະອາດເອົາໃຈໃສ່ປະຕິບັດວຽກງານຕົວຈິງ ທີ່ພັກລັດມອບໝາຍໃຫ້ມີຜົນສຳເລັດ ເພື່ອໃຫ້ກາຍເປັນສະມາຊິກພັກທີ່ເປັນແບບຢ່າງ ທີ່ດີໃນຕໍ່ໜ້າ.