ການປະກອບສ່ວນ ຂອງຂະບວນເຜົ່າມົ້ງ ໃນງານສະເຫຼີມສະຫຼອງຄົບຮອບ 20 ປີ ທີ່ຫຼວງພະບາງເປັນເມືອງມໍລະດົກໂລກ.
- ລາຍລະອຽດ
- ສ້າງຂື້ນເມື່ອ ວັນຈັນ, 02 ຕຸລາ 2017 02:55
ການປະກອບສ່ວນ ຂອງຂະບວນເຜົ່າມົ້ງ ໃນງານສະເຫຼີມສະຫຼອງຄົບຮອບ 20 ປີ ທີ່ຫຼວງພະບາງເປັນເມືອງມໍລະດົກໂລກ.
ໃນຕອນເຊົ້າຂອງວັນທີ 9 ທັນວາຜ່ານມາ ຂະບວນເຜົ່າມົ້ງພາຍໃນເທດສະບານ ກໍ່ໄດ້ເປັນສີສັນໜຶ່ງທາງດ້ານວັດທະນາທຳຂອງ
ຊົນເຜົ່າມົ້ງລາວ ຢູ່ແຂວງຫຼວງພະບາງ ເຊິ່ງໄດ້ປະກອບສ່ວນ ໃນງານແຫ່ສະເຫຼີມສະຫຼອງວັນຄົບຮອບ 20 ປີ ເມືອງຫຼວງພະບາງເປັນເມືອງມໍລະດົກໂລກ, ພາຍໃຕ້ການຊີ້ນຳ-ນຳພາຂະບວນ ໂດຍ ທ່ານ ຊົວລືເຮີ ນາຍບ້ານ-ບ້ານນາສຳພັນ ໃນກ້ອນຂະບວນດັ່ງກ່າວລວມມີ 200 ກ່ວາຄົນ, ຍິງ 100 ຄົນ.
ເຜົ່າມົ້ງເປັນເຜົ່າໜຶ່ງທີ່ມີການດຳລົງຊີວິດທີ່ແຕກຕ່າງກັນກໍ່ຄື ສີສັນການນຸງຖື, ການນັບຖືທາງດ້ານຮິດຄອງປະເພນີ ຂະບວນແຫ່ຂອງເຜົ່າມົ້ງໃນຄັ້ງນີ້ ແມ່ນສະແດງເຖິງເອກະລັກຂອງຊົນເຜົ່າເຊັ່ນ: ເປົ່າແຄນ, ຟ້ອນ, ໂຍນໝາກຄອນ; ການນຸງຖືຕາມຮິດຄອງປະເພນີ. ແຕ່ກໍ່ແມ່ນເຜົ່າໜຶ່ງທີ່ມີການປະກອບສ່ວນໃນການຈັດຕັ້ງປະຕິບັດຕາມແນວ ທາງນະໂຍບາຍຂອງພັກ-ລັດ ອັນຖືກຕ້ອງ ໂດຍສະເພາະປະຕິບັດຕາມແຜນພັດທະນາເສດຖະກິດ-ສັງຄົມ 5 ປີຂອງແຂວງ ໃນແຕ່ລະສະໄໝທີ່ໄດ້ວາງອອກ.
ການປະກອບສ່ວນກ້ອນກຳລັງໃນຄັ້ງນີ້ ແມ່ນສະແດງເຖິງການຊົມເຊີຍໝາກຜົນທາງດ້ານການອານຸລັກຮັກສາມໍລະດົກຂອງຊາວຫຼວງພະບາງ ໂດຍພາຍໃຕ້ການຊີ້ນຳ-ນຳພາຂອງພັກ-ລັດ, ສິ່ງສຳຄັນແມ່ນໄດ້ແບ່ງຄວາມຮັບຜິດຊອບໃຫ້ພາກສ່ວນຕ່າງໆທີ່ກ່ຽວຂ້ອງໃນພາກລັດ ແລະ ເອກະຊົນໃນການປະຕິບັດລະບຽບຂອງມໍລະດົກໃຫ້ເຂັ້ມງວດມາໂດຍ ຕະຫຼອດຈາກການຮ່ວມ ແຮງ-ຮ່ວມໃຈຂອງຊັ້ນຄົນບັນດາເຜົ່າຈິ່ງເປັນການດຶງດູດແຂກພາຍໃນ-ຕ່າງປະເທດເຂົ້າມາທ່ຽວຊົມເມືອງມໍລະດົກໂລກ ແລະ ລົງຄະແນນສຽງໃຫ້: ຫຼວງພະບາງເປັນເມືອງຍອດນິຍົມການທ່ອງທ່ຽວ 9 ຄັ້ງຄື: 2005, 2006, 2007, 2008, 2010, 2011, 2012, 2014 ແລະ 2015.